راولپنڈی: چیف آف آرمی سٹاف جنرل قمر جاوید باجوہ نے سی ایم ایچ سمیت آرمی میڈیکل کور کے مختلف سیٹ اپ کا الوداعی دورہ کیا۔
پاک فوج کے شعبہ تعلقات عامہ(آئی ایس پی آر) کے مطابق پاکستان آرمی کی سرجن جنرل لیفٹیننٹ جنرل نگار جوہر بھی دورے کے دوران آرمی چیف کے ہمراہ تھیں۔
آرمی چیف نے کمبائنڈ ملٹری ہسپتال (سی ایم ایچ) راولپنڈی کا دورہ کیا،میجر جنرل محمد محسن قریشی کمانڈنٹ سی ایم ایچ نے انہیں جدید ترین طبی سہولیات کے بارے میں بریفنگ دی۔
آئی ایس پی آر کے مطابق آرمی چیف کو طبی دیکھ بھال کے طریقوں کے حوالے سے بریفنگ دی گئی اور بتایا گیا کہ مریضوں کی دیکھ بھال ہسپتال انتظامیہ کی توجہ کا مرکز ہے،سویلین/غیر مستحق مریضوں کی سہولت کے لیے خصوصی کاؤنٹر بھی قائم کیے گئے ہیں۔
مریضوں کو دوستانہ ماحول فراہم کرنے اور مریضوں کے اٹینڈنٹ کے لیے متعلقہ سہولیات فراہم کرنے کی کوششیں کی جا رہی ہیں۔
اس موقع پر آرمی چیف کو اکیڈمک سنٹر میں لائیو سرجری کے عمل کے ذریعے ڈاکٹروں کو تربیت فراہم کرنے کے لیے نیا قائم کیا گیا کنٹرول روم بھی دکھایا گیا،آرمی چیف نے آرمی میڈیکل کور کی کوششوں کو سراہا۔
آئی ایس پی آر کے مطابق میڈیکل کورمسلح افواج ، ان کے اہل خانہ اور سویلین مریضوں کو معیاری صحت کی دیکھ بھال اور جدید ترین بحالی کی خدمات فراہم کر رہی ہے،دیگر سہولیات کے علاوہ، شہدا فیملیز اینڈ ویٹرنز کو طبی سہولت بغیر کسی رکاوٹ کے بنیادی صحت کی سہولیات فراہم کرتا ہے.
سہولیات میں خون کے نمونے لینے، ادویات اور شہداء کے خاندانوں اور 75 سال کی عمر تک کے سینئر سابق فوجیوں کے چیک اپ شامل ہیں۔
اس موقع پر آرمی چیف نے مسلح افواج کے پوسٹ گریجویٹ انسٹی ٹیوٹ کے نئے ٹریننگ بلاک کا سنگ بنیاد بھی رکھا،بعد ازاں آرمی چیف نے نئے تعمیر شدہ فوجیوں کے گیسٹ رومز، نئے قائم کردہ آرمی ہیلپ سینٹر اور آرمڈ فورسز انسٹی ٹیوٹ آف کارڈیالوجی کی اپ گریڈ شدہ سہولیات کا بھی دورہ کیا۔
آرمی چیف نے اے ایم سی کے ڈاکٹروں اور صحت کی دیکھ بھال کرنے والے پیشہ ور افراد کی ڈیوٹی اورکام کے لیے بے لوث لگن کی تعریف کی، آرمی چیف نے صحت کی دیکھ بھال کے بنیادی ڈھانچے میں شامل کی جانے والی بہتری کو سراہا۔
آرمی چیف کاکہنا تھا کہ فوجیوں اور ان کے خاندانوں کے لیے معیاری صحت کی دیکھ بھال فوج کے فلاحی نظام کی بنیادی خصوصیت ہے اور فوجیوں کے مورال کے لیے اہم ہے۔
قبل ازیں سی ایم ایچ پہنچنے پر کور کمانڈر راولپنڈی لیفٹیننٹ جنرل ساحر شمشاد مرزا نے آرمی چیف کا استقبال کیا۔
The post آرمی چیف جنرل قمرجاوید باجوہ کا سی ایم ایچ کا الوداعی دورہ appeared first on ایکسپریس اردو.